Wasim akram: ఏమో.. నిజంగానే అతడు డబ్బు తీసుకొని ఉండొచ్చు: వసీం అక్రమ్‌

కరాచీ: పాకిస్థాన్‌(Pakistan) మాజీ కెప్టెన్‌ సలీం మాలిక్‌ తననో పనివాడిలా చూసేవాడంటూ వసీం అక్రమ్‌(Wasim Akram) సంచలన ఆరోపణలు చేసిన విషయం తెలిసిందే. తన జీవిత చరిత్ర ‘సుల్తాన్‌.. ఎ మెమోయర్‌’ అనే పుస్తకంలో మరో మాజీ కెప్టెన్‌ రషీద్‌ లతీఫ్‌పైనా ఈ మాజీ కెప్టెన్‌ విమర్శలు గుప్పించాడు.

‘‘1996 లార్డ్స్‌ వేదికగా జరిగిన టెస్టు మ్యాచ్‌లో కొందరు లాబీయిస్టులు మ్యాచ్‌ ఫిక్సింగ్‌ కోసం సంప్రదించినట్లు రషీద్‌ సండే టెలిగ్రాఫ్‌ పత్రికకు ఇచ్చిన ఇంటర్వ్యూలో పేర్కొన్నాడు. అందుకు £15,000 డబ్బును ఆశ చూపారనీ అతడు తెలిపాడు. ఎవరికి తెలుసు అతడు నిజంగానే ఆ డబ్బును తీసుకుని ఉండొచ్చు. ఎందుకంటే, ఈ విషయాన్ని జట్టు కెప్టెన్‌, కోచ్‌, మేనేజర్లకు అతడు చెప్పాడా? లేదు కదా. అతడు అందరి దృష్టినీ ఆకర్షించాలని అనుకున్నప్పుడే ఇలాంటి విషయాలు బయటకు రావడం గమనార్హం’’ అని అక్రమ్‌ తెలిపాడు. ఇక తన సహచర ఆటగాడు ఆమిర్‌ సోహైల్‌ సైతం లాబీయింగ్‌కి పాల్పడేవాడని.. అతడిని ‘జాంబీ ఫిగర్‌’ అని అక్రమ్‌ విమర్శించాడు.