రక్తదానం ప్రాణదానంతో సమానం: డీజీపీ

రక్తదానం చేస్తున్న డీజీపీ శివధర్‌రెడ్డి

ఈనాడు, హైదరాబాద్‌: రక్తదానం చేస్తే ప్రాణదానం చేసినట్లేనని డీజీపీ బత్తుల శివధర్‌రెడ్డి పేర్కొన్నారు. పోలీస్‌ అమరవీరుల సంస్మరణ దినం కార్యక్రమాల్లో భాగంగా బుధవారం తొలిసారి డీజీపీ కార్యాలయంలో రెడ్‌క్రాస్‌ సొసైటీ రక్తదాన శిబిరం నిర్వహించింది. ఈ సందర్భంగా డీజీపీ, అదనపు డీజీపీ మహేశ్‌ భగవత్, ఐజీపీలు చంద్రశేఖర్‌రెడ్డి, రమేశ్‌ సహా 164 మంది అధికారులు, కార్యాలయ సిబ్బంది రక్తదానం చేశారు. ఈ సందర్భంగా డీజీపీ మాట్లాడుతూ... ‘‘రోడ్డు ప్రమాదాల కారణంగా రాష్ట్రంలో ఏటా 8 వేల మంది ప్రాణాలు కోల్పోతున్నారు. రక్తం అందుబాటులో ఉంటే అందులో కొందరినైనా కాపాడే అవకాశముంటుంది. రెండు రోజుల క్రితం హైదరాబాద్‌ నగర పోలీసులు నిర్వహించిన రక్తదాన శిబిరంలో 4500 యూనిట్ల రక్తాన్ని సేకరించారు. ఏటా ప్రతి ఒక్కరూ నాలుగుసార్లు రక్తదానం చేయొచ్చని వైద్యులు చెబుతున్నారు. కనీసం ఒక్కసారైనా రక్తదానం చేయాలి’’ అని సూచించారు. కార్యక్రమంలో ఏఐజీలు రమణకుమార్, నాగరాజు తదితరులు పాల్గొన్నారు.