Unfit Vehicles: గడువు ముగిసిన వాహనాలు 38 వేలు!

క్యాబ్‌లు, కాంట్రాక్ట్‌ క్యారేజ్‌ బస్సులు, గూడ్సు వాహనాలు అధికం
ఫిట్‌నెస్‌ లేకుండా రోడ్డెక్కుతున్నవి వేలల్లో..
ప్రాణాలతో వాహన యజమానుల చెలగాటం

ఈనాడు, హైదరాబాద్‌: రాష్ట్రంలో ఫిట్‌నెస్‌ లేకుండా రోడ్లపై తిరుగుతున్న వాహనాలు వేల సంఖ్యలో ఉన్నాయి. వాహన యజమానులు నిర్లక్ష్యంగా వ్యవహరిస్తుండటంతో ప్రమాదాల ముప్పు పెరుగుతోంది. రాష్ట్రవ్యాప్తంగా 38 వేల పైచిలుకు వాహనాలు ఫిట్‌నెస్‌ సర్టిఫికెట్లు లేకుండా తిరుగుతున్నాయి. ఇందులో క్యాబ్‌లు, కాంట్రాక్ట్‌ క్యారేజ్‌ (ప్రైవేటు) బస్సులతో పాటు హెవీ, మీడియం గూడ్సు వాహనాలున్నాయి. పర్మిట్లు లేకుండా 11 వేలు, ప్రభుత్వానికి పన్ను చెల్లించనివి 25 వేలకుపైగా వాహనాలున్నాయి.

ప్రయాణికుల్ని, వస్తువులను తరలించే వాహనాలు రోడ్డెక్కాలంటే వాటికి ఫిట్‌నెస్‌ సర్టిఫికెట్‌ తప్పనిసరి. వాహనంలోని ఇంజిన్, బ్రేకులు, లైట్లు, సిగ్నల్‌ వ్యవస్థ వంటి అంశాలను తనిఖీ చేసిన తర్వాత మాత్రమే ఈ సర్టిఫికెట్‌ ఇస్తారు. కొత్త వాహనాలకు ఎనిమిదేళ్ల వరకు రెండేళ్లకోసారి... ఆ తర్వాత ప్రతి ఏడాది ఫిట్‌నెస్‌ సర్టిఫికెట్‌ తీసుకోవాలి. కానీ రహదారి భద్ర]త విషయంలో చాలామంది యజమానులు అనుసరిస్తున్న ధోరణి ఆందోళన కలిగిస్తోంది. ప్రయాణికులు, సరకుల్ని రవాణా చేసేందుకు అనుమతి పత్రమైన పర్మిట్‌ను తీసుకోకుండానే వేల వాహనాలను తిప్పుతున్నారు. 

పోలీసు, ఎన్‌హెచ్‌ఏఐతో అనుసంధానం

ఫిట్‌నెస్, పర్మిట్లు లేకుండా తిరుగుతున్న వాహనాలను రవాణాశాఖ ఇటీవల గుర్తించింది. ‘ఈ-ఎన్‌ఫోర్స్‌మెంట్‌’ ద్వారా రూపొందించిన కొత్త వ్యవస్థతో నిబంధనలు ఉల్లంఘిస్తున్న వాహనాలపై చర్యలకు అధికారులు సిద్ధమవుతున్నట్లు సమాచారం. 

• మొదటిదశలో- పోలీస్‌ శాఖ, ఎన్‌హెచ్‌ఏఐ, హెచ్‌ఎండీఏ వంటి సంస్థలు సేకరిస్తున్న వాహనాల సమాచారాన్ని రవాణాశాఖ డేటాతో అనుసంధానించి విశ్లేషించారు. 
• రెండో దశలో- రవాణాశాఖ తమ వద్ద ఉన్న సమాచారాన్ని ఇతర శాఖలతో పంచుకోనుంది. దాంతో పన్ను, పర్మిట్, ఫిట్‌నెస్‌ సర్టిఫికెట్‌ గడువు ముగిసిన వాహనాలకు ఎలాంటి ప్రభుత్వ సేవలు, బుకింగ్‌లు అందుబాటులో ఉండవు. డేటా అనుసంధాన ప్రక్రియ పూర్తి స్థాయిలో అమల్లోకి వచ్చాక ఈ వాహనాలపై చర్యలు నమోదవుతాయని అధికారులు చెబుతున్నారు.