జైపుర్‌ ఎక్స్‌ప్రెస్‌ ఇక కాచిగూడ నుంచి..

ఈనాడు, హైదరాబాద్‌: జైపుర్‌ ఎక్స్‌ప్రెస్‌ (నెం.19714/19713) బయల్దేరే టెర్మినల్‌ను మారుస్తున్నట్లు దక్షిణ మధ్య రైల్వే ప్రకటించింది. ఇంతవరకు ఈ రైలు సికింద్రాబాద్‌లో బయల్దేరి వెళుతుండగా.. ఇకపై కాచిగూడ టెర్మినల్‌ నుంచి ప్రారంభం కానుంది. ఈ నిర్ణయం.. జైపుర్‌ నుంచి బయల్దేరే రైలుకు ఈనెల 29వ తేదీ నుంచి, కాచిగూడలో బయల్దేరే రైలుకు మే 1వ తేదీ నుంచి అమల్లోకి వస్తుంది. కాచిగూడ - జైపుర్‌ ఎక్స్‌ప్రెస్‌ కాచిగూడలో సోమవారం రాత్రి 9.15 గంటలకు బయల్దేరుతుంది. బుధవారం ఉదయం 6.45 గంటలకు జైపుర్‌ చేరుకుంటుంది. తిరుగు ప్రయాణంలో జైపుర్‌లో శనివారం రాత్రి 10.35 గంటలకు బయల్దేరే రైలు సోమవారం ఉదయం 7.15 గంటలకు కాచిగూడకు చేరుతుంది.