Salary Package: ‘ప్రాంగణ’ ప్యాకేజీ.. ఏటేటా పైపైకి..

ఈనాడు, హైదరాబాద్‌: బీటెక్‌ విద్యార్థులకు ప్రాంగణ నియామక వేతన ప్యాకేజీ ఏటేటా పెరుగుతోంది. ప్రతి సంవత్సరం సగటున సుమారు 9 శాతం వృద్ధి నమోదవుతోంది. కేంద్ర విద్యాశాఖ తాజా నివేదిక ప్రకారం 2021-22 విద్యా సంవత్సరంలో ఇంజినీరింగ్‌ విద్యార్థుల సరాసరి వార్షిక వేతనం రూ.4,57,575. ‘దేశవ్యాప్తంగా బీటెక్‌లో దాదాపు 12 లక్షల సీట్లు ఉండగా, అందులో ఏటా సుమారు 8 లక్షల మంది ప్రవేశాలు పొందుతున్నారు. చివరకు దాదాపు 5 లక్షల మంది ఉత్తీర్ణత సాధిస్తున్నారు. వారిలో 3.50 లక్షల మంది వరకు ప్రాంగణ నియామకాల్లో ఎంపికవుతున్నారు’ అని ఆ నివేదిక వెల్లడించింది. గత కొన్నేళ్లుగా సగటు వార్షిక వేతనం రూ.3-4 లక్షల మధ్యే ఉండగా, తొలిసారి 2021-22లో రూ.4 లక్షలు దాటడం, అంతకుముందు సంవత్సరంతో పోలిస్తే 15 శాతం వృద్ధి నమోదవడం, 2017-18తో పోలిస్తే సగటు వేతనం 43 శాతం పెరగడం గమనార్హం. ‘కరోనా కారణంగా డిజిటల్‌ సాంకేతికతకు గిరాకీ పెరిగింది. వేలాది స్టార్టప్‌లు పుట్టుకురావడం వల్ల విద్యార్థులకు డిమాండ్‌ పెరిగింది. ఈ కారణంగానే 2021-22లో అధిక సంఖ్యలో నిపుణులైన విద్యార్థులను కంపెనీలు ఎంపిక చేసుకోవడంతోపాటు, వార్షిక వేతన ప్యాకేజీనీ పెంచాయి’ అని ఇంజినీరింగ్‌ ఆచార్యులు చెబుతున్నారు.