ఖైదీలపై ఏడాదికి రూ.2,528 కోట్ల ఖర్చు

ఏపీలో రూ.194 కోట్లు, తెలంగాణలో రూ.21 కోట్ల వ్యయం
రాజ్యసభలో కేంద్ర మంత్రి అజయ్‌కుమార్‌ మిశ్ర వెల్లడి

 ఈనాడు, దిల్లీ: దేశవ్యాప్తంగా అన్ని రాష్ట్రాల్లో కలిపి ఖైదీలపై 2022-23 ఆర్థిక సంవత్సరంలో రూ.2,528 కోట్లు ఖర్చు చేసినట్లు కేంద్ర హోంశాఖ సహాయ మంత్రి అజయ్‌కుమార్‌ మిశ్ర తెలిపారు. బుధవారం రాజ్యసభలో వైకాపా సభ్యుడు ఎస్‌.నిరంజన్‌రెడ్డి అడిగిన ప్రశ్నకు ఆయన సమాధానమిచ్చారు. అత్యధికంగా హరియాణలో రూ.406 కోట్లు, తరువాత ఉత్తర్‌ప్రదేశ్‌లో రూ.403 కోట్లు ఖర్చయినట్లు వెల్లడించారు. ఆంధ్రప్రదేశ్‌లో రూ.194 కోట్లు ఖర్చు చేస్తే, తెలంగాణలో కేవలం రూ.21 కోట్లే వ్యయమైనట్లు చెప్పారు. 2018లో జైళ్ల సంఖ్య 1,341 ఉండగా, 2022 నాటికి అది 1,330కి తగ్గినట్టు వెల్లడించారు. ఇదే సమయంలో ఆంధ్రప్రదేశ్‌లో జైళ్ల సంఖ్య 105 నుంచి 106కి పెరిగినట్లు తెలిపారు. తెలంగాణలో మాత్రం 49 నుంచి 37కి తగ్గినట్లు వివరించారు.