Kavitha: నేటి విచారణకు కవిత హాజరవరు

ఈడీకి ఆమె తరఫు న్యాయవాదుల లేఖ!

ఈనాడు, హైదరాబాద్‌: దిల్లీ మద్యం కుంభకోణం కేసులో ఎన్‌ఫోర్స్‌మెంట్‌ డైరెక్టరేట్‌(ఈడీ) ఎదుట భారత రాష్ట్ర సమితి(భారాస) ఎమ్మెల్సీ కవిత హాజరుకావడం లేదు. ఈ మేరకు ఆమె తరఫున న్యాయవాదులు ఈడీకి లేఖ రాసినట్లు తెలుస్తోంది. మద్యం కుంభకోణంలో పాత్రపై విచారించేందుకు గతంలో పలుమార్లు ఈడీ కవితకు నోటీసులు జారీ చేసిన సంగతి తెలిసిందే. ఇతరత్రా అవకాశాలు ఉన్నప్పటికీ ఒక మహిళను విచారణకు వ్యక్తిగతంగా హాజరుకావాలంటూ నోటీసులు జారీ చేయడాన్ని తప్పుపడుతూ ఆమె సుప్రీంకోర్టును ఆశ్రయించారు. ఈ కేసు పెండింగ్‌లో ఉంది. అయితే ఈ నెల 5న ఈడీ మరోమారు కవితకు నోటీసులు జారీ చేసి ఈ నెల 17న(బుధవారం) దిల్లీలోని తమ కార్యాలయంలో విచారణకు హాజరుకావాలని పేర్కొంది. ఒక పక్క న్యాయస్థానంలో కేసు పెండింగ్‌లో ఉండగా మళ్లీ నోటీసులు జారీ చేయడం సరికాదని, విచారణకు కవిత హాజరుకారని ఆమె తరఫు న్యాయవాదులు ఈడీకి ఇప్పటికే లేఖ రాసినట్లు సమాచారం. గత ఏడాది మార్చిలో ఆమె దిల్లీలోని ఈడీ కార్యాలయంలో విచారణకు హాజరయ్యారు.