మద్యం మత్తులో ప్రయాణం ప్రాణాంతకం

డీజీపీ రవిగుప్తా

ఈనాడు, హైదరాబాద్‌: మద్యం మత్తులో వాహనాలు నడపడం ప్రాణాంతకంగా మారుతోందని, దీన్ని నివారించేందుకు పోలీసుశాఖ శాయశక్తులా కృషి చేస్తోందని డీజీపీ రవిగుప్తా వెల్లడించారు. డియాజియో అనే సంస్థ కార్పొరేట్‌ సామాజిక బాధ్యతలో భాగంగా పోలీసుశాఖకు 50 అత్యాధునిక బ్రీత్‌ ఎనలైజర్లను బుధవారం హైదరాబాద్‌లోని పోలీసు ప్రధాన కార్యాలయంలో డీజీపీకి అందించింది. ఈ సందర్భంగా రవిగుప్తా మాట్లాడుతూ బ్రీత్‌ ఎనలైజర్లు వాడి, మద్యం తాగి వాహనాలు నడుపుతున్న వారిని గుర్తించి ప్రమాదాలు నివారించాలని అన్నారు. కార్యక్రమంలో  రైల్వే రహదారి భద్రత అదనపు డీజీ మహేశ్‌ భగవత్‌, హైదరాబాద్‌ ట్రాఫిక్‌ అదనపు కమిషనర్‌ విశ్వప్రసాద్‌, రహదారి భద్రత ఎస్పీ గోనె సందీప్‌, డియాజియో ప్రతినిధులు రవివర్మ, అశ్వత్‌ భైసాని, కె.జైకృష్ణ, రజత్‌ సరోహ్‌ తదితరులు పాల్గొన్నారు.