సుప్రీంకోర్టులో కవిత కేసు 13కి వాయిదా

ఈనాడు, దిల్లీ: దిల్లీ మద్యం కేసులో విచారణకు హాజరుకావాలంటూ ఈడీ ఇచ్చిన నోటీసులను సవాల్‌చేస్తూ భారాస ఎమ్మెల్సీ కవిత దాఖలు చేసిన కేసు విచారణను సుప్రీంకోర్టు మార్చి 13కి వాయిదా వేసింది. ఈ మేరకు జస్టిస్‌ బేలా ఎం.త్రివేది, జస్టిస్‌ పంకజ్‌ మిత్తల్‌లతో కూడిన ధర్మాసనం ఉత్తర్వులు జారీచేసింది. వాస్తవానికి ఈ కేసు బుధవారం నాటి లిస్ట్‌లో ఉన్నప్పటికీ మిగతా కేసుల విచారణ సుదీర్ఘంగా సాగడంతో ఇది రీచ్‌ కాలేకపోయింది. దీంతో చివరలో కవిత తరఫున సీనియర్‌ న్యాయవాది కపిల్‌ సిబల్‌ ఈ అంశాన్ని ప్రస్తావిస్తూ తమ పిటిషన్‌పై త్వరగా విచారణ చేపట్టాలని ధర్మాసనానికి విజ్ఞప్తి చేశారు. అందుకు జస్టిస్‌ బేలా ఎం.త్రివేది సానుకూలంగా స్పందిస్తూ 13వ తేదీకి వాయిదా వేశారు.