సమగ్ర శిక్షా ఉద్యోగుల వేతనాలు చెల్లించండి

ప్రభుత్వానికి హరీశ్‌రావు డిమాండ్‌

ఈనాడు, హైదరాబాద్‌: సమగ్ర శిక్షా ఉద్యోగుల పెండింగ్‌ వేతనాలను వెంటనే చెల్లించాలని మాజీ మంత్రి, భారాస సీనియర్‌ నేత హరీశ్‌రావు ప్రభుత్వాన్ని డిమాండ్‌ చేశారు. బుధవారం ‘ఎక్స్‌’ వేదికగా ఆయన స్పందించారు. ‘‘ఒకటో తేదీన వేతనాలు చెల్లిస్తామని చెప్పిన కాంగ్రెస్‌ పార్టీ ఆచరణలో మాట తప్పింది. గతేడాది డిసెంబరు నెలకు సంబంధించి 10,632 మంది.. జనవరి, ఫిబ్రవరి నెలలకు సంబంధించి 12,660 మంది సమగ్ర శిక్షా ఉద్యోగులకు వేతనాలు అందలేదు. ప్రభుత్వ పాఠశాలల్లోని మధ్యాహ్న భోజన కార్మికులకు 3 నెలల నుంచి వేతనాలు పెండింగ్‌లో ఉన్నాయి. మధ్యాహ్న భోజనానికి సంబంధించి వంట ఛార్జీలు, కోడిగుడ్ల బిల్లులు కూడా పెండింగ్‌లో ఉన్నాయి. వాటిని వెంటనే చెల్లించాలి’’ అని హరీశ్‌రావు కోరారు.