తెలంగాణలో మళ్లీ పంటల బీమా

వచ్చే పంట కాలం నుంచి పీఎం ఫసల్‌బీమా యోజన అమలు
కేంద్ర వ్యవసాయ సంయుక్త కార్యదర్శికి స్పష్టం చేసిన సీఎం రేవంత్‌రెడ్డి

ఈనాడు, హైదరాబాద్‌: కేంద్ర ప్రభుత్వ పంటల బీమా పథకమైన ప్రధానమంత్రి ఫసల్‌ బీమా యోజన (పీఎంఎఫ్‌బీవై)లో తెలంగాణ మళ్లీ చేరుతున్నట్లు ముఖ్యమంత్రి రేవంత్‌రెడ్డి ప్రకటించారు. రైతులకు దన్నుగా నిలుస్తూ సాగు రంగాన్ని బలోపేతం చేయడమే తమ ప్రభుత్వ లక్ష్యమని,  వారికి రక్షణగా నిలిచేందుకు ఈ నిర్ణయం తీసుకున్నామని తెలిపారు. శుక్రవారం సచివాలయంలో సీఎం రేవంత్‌, వ్యవసాయశాఖ మంత్రి తుమ్మల నాగేశ్వరరావుతో కేంద్ర వ్యవసాయ శాఖ సంయుక్త కార్యదర్శి, పీఎంఎఫ్‌బీవై సీఈవో రితేశ్‌ చౌహాన్‌ సమావేశమయ్యారు. 2016 నుంచి 2020 వరకు తెలంగాణ ఈ పథకంలో ఉందని, ఆ తర్వాత నాటి ప్రభుత్వం దాని నుంచి వైదొలిగిందని రితేశ్‌ తెలిపారు. కేంద్ర పథకంపై చర్చల అనంతరం తెలంగాణ.. మళ్లీ పథకంలో చేరుతుందని సీఎం వెల్లడించారు. రాష్ట్ర ప్రభుత్వ నిర్ణయంపై రితేశ్‌ హర్షం వ్యక్తంచేశారు. వచ్చే పంట కాలం నుంచి రైతులు ఈ పథకం నుంచి పంటల బీమా పొందుతారని వెల్లడించారు.