‘క్రిష్‌’ ముందస్తు బెయిలు పిటిషన్‌పై వివరణివ్వండి

పోలీసులకు హైకోర్టు ఆదేశం

ఈనాడు, హైదరాబాద్‌: మాదకద్రవ్యాల కేసులో గచ్చిబౌలి పోలీసులు నమోదు చేసిన కేసులో సినీ దర్శకుడు క్రిష్‌ ముందస్తు బెయిలు పిటిషన్‌పై వివరణ ఇవ్వాలని పోలీసులను హైకోర్టు ఆదేశించింది. రాడిసన్‌ హోటల్‌లో డ్రగ్స్‌ వినియోగించారన్న ఆరోపణపై నమోదు చేసిన కేసులో ముందస్తు బెయిలు మంజూరు చేయాలంటూ క్రిష్‌ పిటిషన్‌ దాఖలు చేశారు. దీనిపై జస్టిస్‌ జి.రాధారాణి విచారణ చేపట్టారు. పిటిషనర్‌ తరఫు న్యాయవాది వాదనలు వినిపిస్తూ.. ఎలాంటి ఆధారాలు లేకుండా కేసు నమోదు చేశారన్నారు. ఈ కేసులో మొదటి నిందితుడైన జి.వివేకానంద ఇచ్చిన వాంగ్మూలం ఆధారంగా పిటిషనర్‌ను పదో నిందితుడిగా పేర్కొంటూ కేసు నమోదు చేశారన్నారు.  దర్యాప్తునకు అవసరమైనపుడు పిటిషనర్‌ హాజరవుతారని, కోర్టు విధించే షరతులకు లోబడి ఉంటారని పేర్కొన్నారు. వాదనలను విన్న న్యాయమూర్తి పోలీసులను వివరణ ఇవ్వాలని ఆదేశిస్తూ విచారణను ఈ నెల 4కు వాయిదా వేశారు.