3 నుంచి ఖమ్మంలో ఐక్యత మహాసభలు

ఈటీవీ-ఖమ్మం: ప్రజాస్వామిక విలువలను కాలరాస్తూ, ఫాసిస్టు విధానాలతో పాలన సాగిస్తున్న భాజపాకు వ్యతిరేకంగా దేశంలోని అన్ని విప్లవశక్తులను ఏకం చేస్తున్నామని సీపీఐ(ఎంఎల్‌) మాస్‌లైన్‌ ప్రజాపంథా ముఖ్యనేతలు పోటు రంగారావు, ప్రదీప్‌సింగ్‌ ఠాకూర్‌ అన్నారు. ఖమ్మంలో శుక్రవారం నిర్వహించిన విలేకరుల సమావేశంలో మాట్లాడారు. ఖమ్మం వేదికగా ఆదివారం నుంచి మంగళవారం వరకు మూడురోజుల పాటు ఐక్యత మహాసభలు నిర్వహించనున్నట్లు వెల్లడించారు. ఖమ్మం నగరంలో ఆదివారం భారీ ప్రదర్శన, బహిరంగ సభ ఉంటుందన్నారు. సభకు జర్మనీ, నేపాల్‌ ప్రతినిధులతోపాటు దేశంలోని 16 రాష్ట్రాల నుంచి 300 మంది ప్రతినిధులు హాజరవుతారని తెలిపారు.