రెండు రోజుల్లో జస్టిస్‌ ఘోష్‌కు ‘ఉత్తర్వుల’ ప్రతి

బీఆర్కే భవన్‌లో కాళేశ్వరం న్యాయ విచారణ కమిషన్‌ కార్యాలయం?

ఈనాడు, హైదరాబాద్‌: కాళేశ్వరం ఎత్తిపోతల పథకంపై న్యాయ విచారణకు కమిషన్‌ను ఏర్పాటు చేస్తూ రాష్ట్ర ప్రభుత్వం జారీచేసిన ఉత్తర్వుల కాపీని.. కమిషన్‌కు నేతృత్వం వహించనున్న సుప్రీంకోర్టు విశ్రాంత న్యాయమూర్తి జస్టిస్‌ పినాకి చంద్రఘోష్‌కు నీటిపారుదల శాఖ అందించనుంది. దీనికోసం ఆ శాఖ కార్యదర్శి రాహుల్‌ బొజ్జా నేతృత్వంలో అధికారుల బృందం రెండు రోజుల్లో కోల్‌కతాకు వెళ్లనున్నట్లు తెలిసింది. ఈ కమిషన్‌ కోసం హైదరాబాద్‌లోని బూర్గుల రామకృష్ణారావు భవన్‌లో కార్యాలయం కేటాయించనున్నట్లు సమాచారం. కాళేశ్వరం ఎత్తిపోతలపై న్యాయ విచారణకు రాష్ట్ర ప్రభుత్వం ఈ నెల 12న ఉత్తర్వులు జారీ చేసిన విషయం తెలిసిందే. జూన్‌ 30లోగా కమిషన్‌ విచారణ పూర్తి చేయాలని ఉత్తర్వుల్లో ప్రభుత్వం పేర్కొంది. ఈ క్రమంలో నీటిపారుదల శాఖ అధికారులు జస్టిస్‌ ఘోష్‌ను కలిసి ప్రభుత్వ ఉత్తర్వుల ప్రతిని అందజేయడంతోపాటు మేడిగడ్డ, అన్నారం, సుందిళ్ల బ్యారేజీల వివరాలను అందజేయనున్నట్లు సమాచారం.