సరిహద్దు రాష్ట్రాల్లో ఓటు హక్కు వినియోగానికి వెసులుబాటు

ఎన్నికల రోజుల్లో వేతనంతో కూడిన సెలవు

ఈనాడు, హైదరాబాద్‌: తెలంగాణలోని 17 లోక్‌సభ స్థానాలకూ, సికింద్రాబాద్‌ కంటోన్మెంట్‌ అసెంబ్లీ స్థానానికి మే 13న పోలింగ్‌ జరగనుండగా.. ఆ రోజున వేతనంతో కూడిన సెలవుగా ఇప్పటికే రాష్ట్ర ప్రభుత్వం ప్రకటించింది. ఏపీలోనూ అదే రోజున పోలింగ్‌ ఉండడంతో తెలంగాణలో ఉంటున్న ఆ రాష్ట్ర ఓటర్లకూ ఇది వర్తిస్తుంది. అయితే ఇతర సరిహద్దు రాష్ట్రాలైన ఛత్తీస్‌గఢ్‌ , మహారాష్ట్ర, కర్ణాటకలలో వేర్వేరు తేదీల్లో పోలింగ్‌ ఉండగా.. తెలంగాణలో పనిచేస్తున్న ఆ రాష్ట్రాల వారికి కూడా వెసులుబాటు కల్పించింది. ఆయా రోజులను వేతనంతో కూడిన సెలవుగా ప్రభుత్వం ప్రకటించింది. రాష్ట్రంలో పనిచేస్తున్న దినసరి కూలీలు, కార్మికులు తమ ఓటుహక్కును వినియోగించుకోవడానికి సొంత ప్రాంతాలకు వెళ్లడం ద్వారా రోజువారీ ఆదాయాన్ని కోల్పోకూడదని సర్కారు ఈ నిర్ణయం తీసుకుంది. ఈ మేరకు సీఎస్‌ శాంతికుమారి గురువారం ఉత్తర్వులు జారీచేశారు.