వేడెక్కిన తెలంగాణ

నిర్మల్‌ జిల్లాలో అత్యధికంగా 43.1 డిగ్రీలు నమోదు
11 జిల్లాల్లో 42.1 డిగ్రీలకు పైగా ఉష్ణోగ్రతలు
రానున్న మూడు రోజులూ తీవ్ర ఎండలే

ఈనాడు, హైదరాబాద్‌: సూర్యుడి భగభగలతో రాష్ట్రం వేడెక్కింది. అనేక జిల్లాల్లో ఎండవేడికి ప్రజలు అల్లాడుతున్నారు. ప్రధానంగా ఉత్తర తెలంగాణ ఉడుకుతోంది. వారం రోజులుగా 40 డిగ్రీల సెల్సియస్‌ వద్ద ఉన్న ఉష్ణోగ్రతలు గురువారం నాటికి మరింత పెరిగాయి. రాష్ట్రంలోనే అత్యధికంగా నిర్మల్‌ జిల్లా దస్తూరాబాద్‌లో 43.1 డిగ్రీలు నమోదైంది. ఈ ఏడాదికి ఇదే రాష్ట్రంలో నమోదైన అత్యధిక ఉష్ణోగ్రత. మొత్తం 11 జిల్లాల్లో 42.1 డిగ్రీలకుపైగా నమోదయినట్లు తెలంగాణ రాష్ట్ర అభివృద్ధి, ప్రణాళిక సంస్థ నివేదికలో పేర్కొంది. శుక్ర, శని, ఆదివారాల్లోనూ ఎండల తీవ్రత కొనసాగుతుందని వాతావరణ శాఖ హెచ్చరించింది. బుధవారం రాత్రి హైదరాబాద్‌, ఆదిలాబాద్‌లలో ఉక్కపోతతో ప్రజలు ఇబ్బందులు పడ్డారు.