పార్వతీ బ్యారేజీ నీటి విడుదల నిలిపివేత

మంథని, న్యూస్‌టుడే: కాళేశ్వరం ప్రాజెక్టులోని పార్వతీ బ్యారేజీ నుంచి గురువారం రాత్రి దిగువన గోదావరిలోకి నీటిని వదిలారు. పెద్దపల్లి జిల్లా మంథని మండలం సిరిపురం వద్ద ఉన్న బ్యారేజీలో ప్రస్తుతం 1.75 టీఎంసీల నీటి నిల్వ ఉంది. కాగా బ్యారేజీ నుంచి నీటిని వదలాలని జాతీయ డ్యాం భద్రత సంస్థ(ఎన్‌డీఎస్‌ఏ) ఆదేశాల మేరకు గురువారం రాత్రి 4 గేట్లు ఎత్తి నీటిని విడుదల చేశామని బ్యారేజీ ఈఈ ఓంకార్‌సింగ్‌ తెలిపారు. తిరిగి శుక్రవారం ఉదయం నీటి విడుదల నిలిపివేయాలని ఉన్నతాధికారులు ఆదేశించడంతో ఆపేసినట్లు చెప్పారు. మరోవైపు పార్వతీ బ్యారేజీ నుంచి నీటి విడుదలతో మంథని తీరం వద్ద గోదావరి జలకళ సంతరించుకుంది. నదిలో స్నానానికి వచ్చే భక్తులు లోపలికంటూ వెళ్లొద్దని అధికారులు హెచ్చరించారు.