ఆశల పైరు.. ఎండిన తీరు

వనపర్తి జిల్లా గోపాల్‌పేట మండలం చెన్నూరు గ్రామానికి చెందిన రైతులు ఎల్లారెడ్డి, నారాయణరెడ్డిల పక్కపక్క పొలాలు ఇవి. వీరిద్దరూ డిసెంబరు చివర్లో ఒకేసారి వరి సాగు మొదలుపెట్టారు. ప్రస్తుతం నారాయణరెడ్డి పొలం పచ్చగా కనిపిస్తుంటే.. ఎల్లారెడ్డిది మాత్రం ఎండిపోయి ఉంది. దీనికి కారణం భూగర్భజలాలే. వర్షాలు సమృద్ధిగా కురవక జలాశయాలు అడుగంటుతున్నాయి. దీంతో జిల్లాలో చాలామంది రైతులకు బోరు నీళ్లే దిక్కయ్యాయి. మరో పది, పదిహేను రోజుల్లో పంట చేతికొస్తుందనుకున్న తరుణంలో భూగర్భ జలాలు అడుగంటి బోర్లు కూడా వట్టిపోయి పొలాలు ఎండుముఖం పడుతున్నాయి. నారాయణరెడ్డి బోరు అరకొరగానైనా నీరు పోస్తుండగా.. ఎల్లారెడ్డి బోరు మాత్రం పూర్తిగా వట్టిపోయింది. చేసేది లేక పది రోజులుగా ఒకటిన్నర ఎకరాల్లోని వరి పైరును వదిలేశారు. కంకులు కనిపిస్తున్నా.. అంతా తాలు రావడంతో పశుగ్రాసానికి తప్ప దేనికీ పనికి రాకుండా పోయిందని, సుమారు  రూ.70 వేలు నష్టపోయానని రైతు వాపోతున్నారు.

న్యూస్‌టుడే, గోపాల్‌పేట