సాగర్‌ ఎడమకాలువకు నీటి విడుదల

జలాశయాల్లో నిల్వలపై మంత్రి ఉత్తమ్‌ ఆరా

ఈనాడు, హైదరాబాద్‌, నాగార్జునసాగర్‌, న్యూస్‌టుడే: రాష్ట్రంలోని జలాశయాల్లో ఏ మేరకు నీటి నిల్వలు అందుబాటులో ఉన్నాయని నీటిపారుదల శాఖ మంత్రి ఎన్‌.ఉత్తమ్‌కుమార్‌రెడ్డి ఆరా తీశారు. సోమవారం హైదరాబాద్‌లోని శాఖ ప్రధాన కార్యాలయం జలసౌధకు వచ్చిన మంత్రి అందుబాటులో ఉన్న ఈఎన్సీలు, పలువురు సీఈలతోపాటు శాఖ ప్రత్యేక కార్యదర్శి ప్రశాంత్‌ జీవన్‌పాటిల్‌తో చర్చించారు. అందిన సమాచారం మేరకు.. నాగార్జునసాగర్‌ కింద తాగునీటి అవసరాలపై చర్చ జరిగినట్లు తెలిసింది. కనీసం వెయ్యి క్యూసెక్కుల చొప్పున కొన్ని రోజులు నీటిని విడుదల చేస్తేనే అవసరాలు తీరుతాయని చర్చించారు. అవసరాన్నిబట్టి సాగర్‌ నుంచి నీటిని విడుదల చేయాలని మంత్రి సూచించారు. ఈ నేపథ్యంలో మధ్యాహ్నం తరువాత నాగార్జునసాగర్‌ ఎడమ కాలువ హెడ్‌ రెగ్యులేటర్‌ నుంచి వెయ్యి క్యూసెక్కుల నీటి విడుదలను అధికారులు ప్రారంభించారు. ఈ జలాలు నల్గొండ నుంచి సూర్యాపేట మీదుగా ఖమ్మం జిల్లాలోని పాలేరు జలాశయానికి చేరుకోనున్నాయి. రాత్రి సమయానికి నీటి విడుదలను 2500 క్యూసెక్కులకు పెంచాలని నిర్ణయించినట్లు తెలిసింది.