హెచ్‌ఎండీఏ మాజీ డైరెక్టర్‌ శివబాలకృష్ణకు బెయిల్‌ మంజూరు

ఈనాడు, హైదరాబాద్‌: ఆదాయానికి మించి ఆస్తులు ఉన్నాయనే ఆరోపణలతో అరెస్టయిన హెచ్‌ఎండీఏ మాజీ డైరెక్టర్‌ శివబాలకృష్ణకు అనిశా కోర్టు బుధవారం షరతులతో కూడిన బెయిల్‌ మంజూరు చేసింది. ఆయనపై ఏసీబీ అధికారులు దాఖలు చేసిన పీటీ వారెంట్‌ను తిరస్కరించిన న్యాయస్థానం నిర్ణీత 60 రోజుల్లో ఛార్జిషీట్‌ వేయకపోవడంతో బెయిల్‌ మంజూరు చేసింది. రూ.లక్ష చొప్పున రెండు పూచీకత్తులు సమర్పించాలని ఆదేశించింది. కేసు విచారణ పూర్తయ్యే వరకు దేశం విడిచి వెళ్లరాదని, కోర్టుకు పాస్‌పోర్టును సమర్పించి ఏసీబీ విచారణకు సహకరించాలని పేర్కొంది. ఆయన సోదరుడు శివ నవీన్‌కు సైతం బెయిల్‌ మంజూరు చేసింది. ఈ కేసులో జనవరి 25న శివబాలకృష్ణ అరెస్టయిన విషయం తెలిసిందే.