నేడు, రేపు ఓ మోస్తరు వర్షాలు

ఈనాడు, హైదరాబాద్‌: రాష్ట్రంలో గురు, శుక్ర వారాల్లో ఓ మోస్తరు వర్షాలు కురుస్తాయని వాతావరణ శాఖ బుధవారం తెలిపింది. కొన్ని జిల్లాల్లో ఈదురు గాలులు, ఉరుములు, మెరుపులతో కూడిన తేలికపాటి వర్షాలు కురిసే అవకాశం ఉందని పేర్కొంది. కాగా పలు జిల్లాల్లో బుధవారం జల్లులు కురిశాయి. భద్రాద్రి కొత్తగూడెం జిల్లా పాల్వంచ మండలంలో రాష్ట్రంలోనే అత్యధికంగా 41.2 డిగ్రీల గరిష్ఠ ఉష్ణోగ్రత నమోదయింది. నల్గొండ జిల్లా మాడుగులపల్లిలో 41.1, వనపర్తి జిల్లా కొత్తకోటలో 41.1, జయశంకర్‌ భూపాలపల్లి జిల్లా రోగొండలో 41, ములుగు జిల్లా తాడ్వాయిలో 41, మంచిర్యాల జిల్లా కాసిపేట మండలంలో 40.9 డిగ్రీల సెల్సియస్‌ ఉష్ణోగ్రతలు నమోదయ్యాయి.