విద్యాభివృద్ధిపై ఉపకులపతుల జాతీయస్థాయి సదస్సు

వికసిత్‌ భారత్‌ కార్యక్రమంలో భాగంగా సమావేశం
నేటి నుంచి మూడు రోజుల పాటు నిర్వహణ

శామీర్‌పేట, న్యూస్‌టుడే: దేశంలోని వివిధ విశ్వవిద్యాలయాలకు చెందిన ఉప కులపతులతో శామీర్‌పేట లియోనియాలో సోమవారం నుంచి మూడు రోజుల పాటు ‘ఉన్నత విద్యలో సాధించిన ప్రగతి-భవిష్యత్‌లో సాధించాల్సిన అభివృద్ధి’ అంశంపై జాతీయస్థాయి సదస్సును నిర్వహిస్తున్నట్లు అసోసియేషన్‌ ఆఫ్‌ ఇండియన్‌ యూనివర్సిటీస్‌-(ఏఐయూ) అధ్యక్షుడు జీడీ శర్మ వివరించారు. ఆదివారం ఆయన విలేకరుల సమావేశంలో మాట్లాడుతూ..వికసిత్‌ భారత్‌ కార్యక్రమంలో భాగంగా ఈ సదస్సును నిర్వహిస్తున్నామని, ముఖ్య అతిథిగా రాష్ట్ర ఇన్‌ఛార్జి  గవర్నర్‌ రాధాకృష్ణన్‌ హాజరవుతారని వెల్లడించారు. దేశ, విదేశాలకు చెందిన వివిధ యూనివర్సిటీల ఉపకులపతులు 500 మంది హాజరవుతారని అన్నారు. 2047 నాటికి ఉన్నత విద్యా రంగంలో అభివృద్ధిని సాధించి దేశ ప్రగతి మరింత పెంపొందించే లక్ష్యంతో చర్చలు నిర్వహిస్తామని పేర్కొన్నారు. ఈ సమావేశంలో ఆచార్యులు ఎల్‌ఎస్‌ గణేశ్‌, ఎ.మహేందర్‌రెడ్డి, జి.మాధవి, పంకజ్‌మిట్టల్‌, వినయ్‌కుమార్‌ పాఠక్‌, సుధాకర్‌రావు ఉన్నారు.