గురుకులాల్లో రాత్రి విధుల ఆదేశాలు రద్దు చేయాలి

టీఎస్‌డబ్ల్యూఆర్‌టీఈఏ డిమాండ్‌

ఈనాడు, హైదరాబాద్‌: రాష్ట్రంలోని ఎస్సీ గురుకులాల్లో ఉపాధ్యాయులను రాత్రివేళ పాఠశాలలోనే ఉంటూ విధులు నిర్వహించాలని ఇచ్చిన ఆదేశాలు రద్దు చేయాలని తెలంగాణ ఎస్సీ గురుకుల ఉపాధ్యాయులు, ఉద్యోగుల సంఘం (టీఎస్‌డబ్ల్యూఆర్‌టీఈఏ) డిమాండ్‌ చేసింది. విద్యార్థుల ఆత్మహత్యలకు కారణాలపై శాస్త్రీయ అధ్యయనం చేసి, నివారణ చర్యలు చేపట్టాలని ఆ సంఘం అధ్యక్ష, ప్రధాన కార్యదర్శులు బాలరాజు, దయాకర్‌ డిమాండ్‌ చేశారు. విద్యార్థులకు బోధనేతర కార్యక్రమాలు ఎక్కువగా నిర్వహిస్తున్నారని, తక్కువ సమయంలో సిలబస్‌ పూర్తిచేయడంతో పాటు నూరుశాతం ఫలితాలు సాధించాలన్న కార్యక్రమాలతో మానసిక ఒత్తిడికి గురవుతున్నారని తెలిపారు. గురుకుల ఉపాధ్యాయులకు నైట్‌డ్యూటీ విధులు అప్పగించడం సరికాదని, రాత్రి విధులు నిర్వహించిన టీచర్లు ఉదయం పాఠాలు ఎలా బోధించగలరని ప్రశ్నించారు. గురుకులాల్లో వాచ్‌మెన్ల సంఖ్య పెంచాలని, టీచర్లు కేవలం బోధన విధులకు పరిమితం చేయాలని డిమాండ్‌చేశారు.