ప్రచార రథంపై చెప్పుల దండ

మిరుదొడ్డి, న్యూస్‌టుడే: ఎన్నికల ప్రచార రథాన్ని అడ్డుకొని.. అభ్యర్థి చిత్రపటంపై చెప్పులతో దాడి చేసినందుకు పోలీసులు మంగళవారం కేసు నమోదు చేశారు. మెదక్‌ లోక్‌సభ స్థానం భారాస అభ్యర్థి వెంకట్రామిరెడ్డికి మద్దతుగా సిద్దిపేట జిల్లా దుబ్బాక నియోజకవర్గ పరిధిలోని మిరుదొడ్డి మండలం కాసులాబాద్‌ గ్రామ వీధుల్లో ప్రచార రథం మంగళవారం తిరుగుతోంది. గ్రామానికి చెందిన యాదగిరి, అతడి భార్య, తల్లి వాహనానికి అడ్డుగా వచ్చి ఆపారు. వాహనం ముందున్న అభ్యర్థి చిత్రపటంపై చెప్పుల దండ వేసి.. పటాన్ని చెప్పులతో కొట్టారు. వెంకట్రామిరెడ్డి కలెక్టర్‌గా ఉన్నపుడు తమకు చెందాల్సిన భూమి హక్కులను వేరొకరికి కల్పించారని ఆరోపించారు. ఈ ఘటనపై డ్రైవర్‌ కావేటి బన్ని, భారాస మిరుదొడ్డి మండల అధ్యక్షుడు తోట అంజిరెడ్డి ఫిర్యాదు చేయగా.. ఎస్‌ఐ పరశురాములు కేసు నమోదు చేశారు.