అభిషేక్‌ బోయిన్‌పల్లి మధ్యంతర బెయిల్‌ మే 8 వరకు పొడిగింపు

ఈనాడు, దిల్లీ: దిల్లీ మద్యం కేసులో నిందితుడిగా ఉన్న హైదరాబాద్‌ వ్యాపారి అభిషేక్‌ బోయిన్‌పల్లికి ఈనెల 29వ తేదీ వరకు ఇచ్చిన మధ్యంతర బెయిల్‌ను సుప్రీంకోర్టు మే 8 వరకు పొడిగించింది. ఈ మేరకు జస్టిస్‌ సంజీవ్‌ఖన్నా, జస్టిస్‌ దీపాంకర్‌దత్తాలతో కూడిన ధర్మాసనం గురువారం ఉత్తర్వులు జారీచేసింది. భార్య అనారోగ్యం దృష్ట్యా అభిషేక్‌కు మార్చి 20న కోర్టు మధ్యంతర బెయిల్‌ ఇచ్చి తదుపరి విచారణను ఈనెల 29వ తేదీకి వాయిదా వేసింది. అయితే గురువారం ఈ కేసు లిస్ట్‌లో లేకపోయినా పిటిషనర్‌ తరఫు న్యాయవాది కపిల్‌ సిబల్‌ మెన్షన్‌ చేయడంతో ధర్మాసనం దానిపై విచారించి తదుపరి విచారణను మే 8వ తేదీకి వాయిదా వేసింది. అంతవరకు అతని మధ్యంతర బెయిల్‌ పొడిగిస్తున్నట్లు పేర్కొంది.