కృష్ణా జలాల విడుదలకు కేఆర్‌ఎంబీ ఉత్తర్వులు

మే నెలాఖరుకు తెలంగాణకు 8.5, ఏపీకి 5.5 టీఎంసీలు

ఈనాడు, హైదరాబాద్‌: కృష్ణా జలాల విడుదలకు సంబంధించి రెండు తెలుగు రాష్ట్రాలకు కృష్ణా బోర్డు గురువారం ఉత్తర్వులు విడుదల చేసింది. మే నెలాఖరు వరకు నాగార్జునసాగర్‌ నుంచి రెండు రాష్ట్రాలు 14 టీఎంసీలు వినియోగించుకునేందుకు వెసులుబాటు కల్పించింది. తెలంగాణకు 8.5 టీఎంసీలు, ఏపీకి 5.5 టీఎంసీలు విడుదల చేయనున్నారు. సాగర్‌లో 500 అడుగుల స్థాయి నుంచి ఈ నీటిని తీసుకోనున్నారు. ఈ మట్టం స్థాయిలో 17.55 టీఎంసీల నీళ్లు అందుబాటులో ఉంటాయని అంచనా వేశారు. వీటిలో భవిష్యత్‌ అవసరాలకు 3.55 టీఎంసీలను కేటాయించారు. గురువారం నాటికి సాగర్‌లో 129.14 టీఎంసీలు (పూర్తి స్థాయి నిల్వ 312.05 టీఎంసీలకు) ఉన్నాయి. జలాశయంలో 590 అడుగులకు గాను నీటి మట్టం 508.50 అడుగుల వద్ద ఉంది. ఈ నెల 12న హైదరాబాద్‌లోని కృష్ణా బోర్డు కార్యాలయంలో జరిగిన త్రిసభ్య కమిటీ సమావేశంలో తీసుకున్న నిర్ణయం మేరకు బోర్డు ఈ ఉత్తర్వులు జారీ చేసింది.