కాంకేర్‌లో తప్పించుకున్న తెలుగు మావోయిస్టులు ఎవరు..?

తెలంగాణ నిఘా విభాగం ఆరా

ఈనాడు, హైదరాబాద్‌: ఇటీవల ఛత్తీస్‌గఢ్‌లోని కాంకేర్‌ జిల్లా బినాగుండ-కోరకట్ట అటవీ ప్రాంతంలో జరిగిన భారీ ఎన్‌కౌంటర్లో తెలుగు రాష్ట్రాలకు చెందిన మావోయిస్టులు తప్పించుకున్నట్లు తెలుస్తోంది. వీరెవరు, ఎటు వెళ్లారన్నదానిపై తెలంగాణ పోలీసులు ఇప్పుడు ఆరా తీస్తున్నారు. ఎన్‌కౌంటర్‌కు ముందే సమావేశం గురించి సమాచారంతో పాటు అందులో తెలుగు నాయకులు కూడా పాల్గొంటున్నట్లు తెలంగాణ నిఘా విభాగం ముందే పసిగట్టిందని సమాచారం. రాష్ట్ర సరిహద్దులకు 200 కిలోమీటర్లకు పైగా దూరం ఉండటంతో ఇక్కడ నుంచి గ్రేహౌండ్స్‌ బలగాలను పంపడం సాధ్యం కాదని భావించారు. ఈలోపే  ఛత్తీస్‌గఢ్‌ పోలీసులు రంగంలోకి దిగారు. మొత్తం 29 మంది మావోయిస్టులు చనిపోగా ఇందులో ఇద్దరు తెలుగువారు ఉన్న సంగతి తెలిసిందే.

కీలక నేతలు తెలుగువారే...

ప్రస్తుతం తెలుగు రాష్ట్రాలు ముఖ్యంగా తెలంగాణకు చెందిన దాదాపు 140 మంది  ఛత్తీస్‌గఢ్‌లో ఆవాసం పొందుతున్నట్లు నిఘా వర్గాల సమాచారం. వీరిలో అనేక మంది కీలక నాయకులు కూడా ఉన్నారు. కేంద్ర కమిటీలో మొత్తం 17 మంది సభ్యులు ఉండగా వారిలో పది మంది తెలుగు రాష్ట్రాలకు చెందిన వారే. సైద్ధాంతికంగా మావోయిస్టు ఉద్యమాన్ని ముందుకు నడిపిస్తుంది వీరే. దీంతో ఛత్తీస్‌గఢ్‌లో మావోయిస్టుల కదలికలపై తెలంగాణ పోలీసులు కన్నేశారు. తాజా ఎన్‌కౌంటర్‌ నుంచి తప్పించుకున్న తెలుగు మావోయిస్టులు ఎవరనే దానిపై తెలంగాణ నిఘా విభాగం దృష్టి సారించింది.