తక్కువ ధరకు ధాన్యం కొనే వ్యాపారులపై చర్యలు తీసుకోండి

కలెక్టర్లకు పౌరసరఫరాల శాఖ ఆదేశం

ఈనాడు, హైదరాబాద్‌: రాష్ట్రంలో తక్కువ ధరకే ధాన్యం కొనుగోలు చేసే వ్యాపారులపై కఠిన చర్యలు తీసుకోవాలని జిల్లా కలెక్టర్లను పౌరసరఫరాలశాఖ ఆదేశించింది. అకాల వర్షాల నేపథ్యంలో కొనుగోలు చేసిన ధాన్యాన్ని మిల్లులకు తరలించాలని, ధాన్యం తడవకుండా టార్పాలిన్‌ కవర్లు సిద్ధం చేసి రక్షణ చర్యలు చేపట్టాలని సూచించింది. రాష్ట్రంలో ఇప్పటివరకు 7,109 ధాన్యం కొనుగోలు కేంద్రాలు తెరిచి..6.75లక్షల మెట్రిక్‌ టన్నుల ధాన్యం కొనుగోలు చేసినట్లు తెలిపింది. కొనుగోలు కేంద్రాలకు తీసుకువచ్చిన ప్రతి గింజను ప్రభుత్వం కొనుగోలు చేస్తుందని, ఈ విషయంలో రైతులు ఎలాంటి ఆందోళన చెందాల్సిన అవసరం లేదని పేర్కొంది. ధాన్యం కొనుగోలు విషయంలో పౌరసరఫరాలు, వ్యవసాయ, మార్కెటింగ్‌ విభాగాలు సమన్వయంతో పనిచేస్తున్నాయని వివరించింది.