విజన్‌-2026కు డోర్నకల్‌ ఉపాధ్యాయుల శ్రీకారం

డోర్నకల్‌, న్యూస్‌టుడే: మహబూబాబాద్‌ జిల్లా డోర్నకల్‌లోని జిల్లా పరిషత్‌ ఉన్నత పాఠశాల ఉపాధ్యాయులు విజన్‌-2026 పేరిట ఓ వినూత్న కార్యక్రమానికి శ్రీకారం చుట్టారు. తమ విద్యార్థుల్లో విద్యా ప్రమాణాలు, హాజరు శాతం మెరుగుదలకు ఓ ప్రతిజ్ఞపత్రం రూపొందించారు. బుధవారం మండుటెండలో విద్యార్థుల నివాసాలకు వెళ్లి తల్లిదండ్రులతో ఆ పత్రంపై సంతకాలు తీసుకున్నారు. విద్యార్థుల సామాజిక, ఆర్థిక, విద్య, సామర్థ్య స్థితిగతులపై సర్వే చేశారు. అనాథలు, ఆర్థికంగా ఇబ్బందులున్న కుటుంబాల పిల్లలుంటే వారి చదువుకు ఆటంకం కలగకుండా పాఠశాలలో నెలకొల్పిన ‘స్టూడెంట్స్‌ వెల్ఫేర్‌ ట్రస్టు’ ద్వారా రవాణా సదుపాయం లేదా ప్రతి నెల ఆర్థిక సాయం చేయాలని నిర్ణయించారు.​​​​​​​