అలిపిరి నడకదారి సమీపంలో చిరుతల సంచారం

భక్తుల కేకలతో అడవిలోకి పరుగు

తిరుమల, న్యూస్‌టుడే: అలిపిరి నడకదారి సమీపంలోని అటవీ ప్రాంతంలో చిరుతపులుల సంచారం భక్తుల్లో కలకలం సృష్టించింది. సోమవారం నడకదారిలోని ఆఖరి మెట్లవద్ద రెండు చిరుతలు సంచరిస్తుండగా భక్తులు వాటిని చూసి బిగ్గరగా కేకలు వేశారు. దీంతో అవి అటవీ ప్రాంతంలోకి పారిపోయాయి. సమాచారం అందుకున్న తితిదే భద్రత, అటవీశాఖల సిబ్బంది అక్కడకు చేరుకుని వాటి జాడలు గుర్తించేందుకు చర్యలు చేపట్టారు. భక్తులను గుంపులుగా పంపడంతో పాటు భద్రతా సిబ్బంది వారి వెంట వెళ్లేలా ఏర్పాటు చేశారు. ఆ ప్రాంతాన్ని ఎప్పటికప్పుడు సీసీ కెమెరాలతో పర్యవేక్షిస్తున్నారు.