ఎంజీఎంలో విద్యుత్తు సరఫరాకు అంతరాయం

అయిదు గంటలపాటు రోగులకు ఇబ్బందులు

వార్డులో కరెంటు లేకపోవడంతో సెలైన్‌తో సహా వరండాలో మహిళా రోగి

ఎంజీఎం ఆసుపత్రి, న్యూస్‌టుడే: ఉత్తర తెలంగాణకు పెద్ద దిక్కైన వరంగల్‌ ఎంజీఎం ఆసుపత్రిలో మంగళవారం సాయంత్రం సుమారు అయిదు గంటలపాటు విద్యుత్తు సరఫరాలో అంతరాయం కలిగింది. దీంతో ఆసుపత్రిలోని అత్యవసర వైద్యవిభాగం ఏఎంసీ, ఆర్‌ఐసీయూ, నవజాత శిశువుల వార్డుల్లో వెంటిలేటర్లపై చికిత్స పొందుతున్న రోగులు, చిన్నారులు ఊపిరాడక తీవ్ర ఇబ్బందులు పడ్డారు. ఆసుపత్రిలో నాలుగు జనరేటర్లు ఉండగా.. అందులో ఒకటి మాత్రమే పనిచేస్తోంది. దీంతో కరెంటు పోతే ఒక్క జనరేటర్‌తో ఆసుపత్రి మొత్తానికి విద్యుత్తు సరఫరా సాధ్యం కావడం లేదు. హుటాహుటిన ఒక జనరేటర్‌కు మరమ్మతు చేయించారు. దీంతో ఐసీయూ రోగులకు ప్రాణాపాయం తప్పింది. ఆసుపత్రిలోని నర్సింగ్‌ స్కూల్‌ వసతిగృహం వెనక ఉన్న విద్యుత్తు స్తంభంపై తీగలకు పతంగి దారం తగలడంతో సరఫరాకు అంతరాయం కలిగిందని మొదట దానికి మరమ్మతులు చేసినా సరఫరా పునరుద్ధరణ కాలేదు. తర్వాత సబ్‌స్టేషన్‌ నుంచి ఆసుపత్రిలో వచ్చే విద్యుత్తు సరఫరా దగ్గరే లోపం ఉన్నట్లు గుర్తించి గంటల తరబడి మరమ్మతు చేశారు. సాయంత్రం 4.30 గంటలకు నిలిచిపోయిన సరఫరా రాత్రి 9.30 గంటలకు పునరుద్ధరించారు.