ఐటీ మంత్రి సలహాదారుగా సాయికృష్ణ

పలు సంస్థలకు సీఈవోల నియామకం

ఈనాడు, హైదరాబాద్‌: ఐటీశాఖను మరింత బలోపేతం చేసేందుకు రాష్ట్ర ప్రభుత్వం చర్యలు చేపట్టింది. ఐటీశాఖ పరిధిలోని శిక్షణ సంస్థలు, స్టార్టప్‌ విభాగాలకు నూతన అధికారులను నియమించింది. ఐటీశాఖ మంత్రి శ్రీధర్‌బాబుకు సలహాదారుగా సాయికృష్ణను నియమిస్తూ ఆ శాఖ ప్రత్యేక ప్రధాన కార్యదర్శి జయేశ్‌ రంజన్‌ ఉత్తర్వులు జారీ చేశారు. ఆయన పదవీకాలం రెండేళ్ల పాటు కొనసాగుతుందని పేర్కొన్నారు. టీవర్క్స్‌ సీఈవోగా జోగిందర్‌ తనికెళ్లను నియమించారు. సీఈవోగా వెంటనే బాధ్యతలు స్వీకరించాలని ఆదేశించారు. వీహబ్‌ సీఈవోగా సీతా పల్లచోళ్లను ప్రభుత్వం నియమించింది. త్వరలోనే మిగతా సంస్థలకు సీఈవోలను నియమించే అవకాశమున్నట్లు సమాచారం.