పన్నులు చెల్లిస్తున్నాం... రోడ్లు బాగు చేయండి!

రహదారిపై గుంతలు పూడ్చాలని మహిళ నిరసన 

బండ్లగూడ, న్యూస్‌టుడే: అధ్వానంగా మారిన రహదారిని బాగు చేయాలని డిమాండ్‌ చేస్తూ వర్షపు నీటితో నిండిన గుంతలో ఓ మహిళ బైఠాయించిన ఘటన హైదరాబాద్‌లోని నాగోల్‌ డివిజన్‌ ఆనంద్‌నగర్‌ చౌరస్తాలో గురువారం చోటుచేసుకుంది. కుంట్లూర్‌కు చెందిన గోటేటి నిహారిక రోజూ ఈ మార్గంలో ద్విచక్ర వాహనంపై ప్రయాణిస్తుంటారు. వారం కిందట చౌరస్తాలోని గుంతల కారణంగా వాహనంపై నుంచి కిందపడి.. స్వల్పంగా గాయపడ్డారు. ఇటీవల వర్షాలకు నీరు నిలిచి ఆ గుంతలన్నీ పెద్దవిగా మారడంతో గురువారం మధ్యాహ్నం... నీటితో నిండిన రోడ్డుపై బైఠాయించారు. తాము పన్నులు చెల్లిస్తున్నామని, మంచి రోడ్లు కావాలని ప్లకార్డులు ప్రదర్శించారు. స్థానిక మహిళలు ఇద్దరు ఆమెకు మద్దతుగా నిలిచారు. చౌరస్తాలో వాహనాలు భారీగా నిలిచిపోవడంతో మహిళా పోలీసులు ఆమెను పక్కకు తీసుకొచ్చారు. స్థానిక ప్రజాప్రతినిధులు, అధికారులు వచ్చి... ఎన్నికల కోడ్‌ ముగియగానే పనులు ప్రారంభిస్తామని హామీ ఇవ్వడంతో నిరసన విరమించారు. నాగోల్‌ పోలీసులు ఆమె వివరాలను నమోదు చేసుకున్నారు.