ఇంజినీర్ల సర్వీసు పొడిగింపు నిలిపివేయండి

మంత్రి ఉత్తమ్‌ను కోరిన ఇంజినీర్ల సంఘం 

ఈనాడు, హైదరాబాద్‌: నీటిపారుదల శాఖలో పదవీ విరమణ అనంతరం సర్వీసు పొడిగింపుపై కొనసాగిస్తున్న వారిని వెంటనే తొలగించాలని హైదరాబాద్‌ ఇంజినీర్ల సంఘం మంత్రి ఉత్తమ్‌కుమార్‌రెడ్డిని కోరింది. సంఘం అధ్యక్షుడు ఏఎస్‌ఎన్‌రెడ్డి, ప్రధాన కార్యదర్శి చక్రధర్, ప్రతినిధులు రాపోలు రవీందర్, రాజశేఖర్, శ్రీనివాస్‌రెడ్డి, వెంకటనారాయణ తదితరులు గురువారం సచివాలయంలో మంత్రిని కలిసి వినతిపత్రం అందజేశారు. ‘గత ప్రభుత్వ హయాంలో కొందరు ఇంజినీర్లు పదవీ విరమణ చేసినప్పటికీ వారి సర్వీసు పొడిగించారు. దీనివల్ల రెగ్యులర్‌ ఇంజినీర్ల సర్వీసుకు నష్టం వాటిల్లింది. ఇప్పటికీ ఈ పద్ధతిలో ముగ్గురు సర్వీసులో ఉన్నారు. ఇకపై ప్రభుత్వం సర్వీసు పొడిగింపు నిర్ణయాలు తీసుకోవద్దు. ప్రభుత్వ మెమో నంబరు 11656 ప్రకారం ఇంజినీర్ల సీనియారిటీని సవరించి.. ఆ మేరకు నల్గొండ, మహబూబ్‌నగర్‌ ఇంజినీర్లకు కూడా న్యాయం చేసేలా రెగ్యులర్‌ పదోన్నతులు కల్పించాలి. జూనియర్‌ ఇంజినీర్లకు అదనపు బాధ్యతలతో పదోన్నతులు ఇవ్వొద్దు’ అని సంఘం నాయకులు మంత్రికి విజ్ఞప్తి చేశారు. అనంతరం నీటిపారుదల కార్యదర్శి రాహుల్‌ బొజ్జాకు వారు వినతిపత్రం అందజేశారు.