మేడిగడ్డలో కొనసాగుతున్న పనులు

బ్యారేజీ దిగువన కొనసాగుతున్న సీసీ బ్లాక్‌ల అమరిక పనులు

మహదేవపూర్, న్యూస్‌టుడే: కాళేశ్వరం ప్రాజెక్టులోని మేడిగడ్డ బ్యారేజీ పునరుద్ధరణ పనులు కొనసాగుతున్నాయి. దెబ్బతిన్న ఏడో బ్లాక్‌ ప్రాంతంలో తాత్కాలిక మరమ్మతులు చేపడుతున్నారు. భారీ వరద ప్రవాహం వస్తే ఏడో బ్లాక్‌లోకి ప్రవేశించకుండా నీటి మళ్లింపు కట్టను మరింత దృఢంగా చేసి కట్ట ఎత్తును పెంచారు. బ్యారేజీ దిగువన షీట్‌పైల్స్‌ను నది గర్భంలోకి దించే పనులు కొనసాగుతుండగా.. సీసీ బ్లాక్‌ల అమరికను చేపడుతున్నారు. గేట్లకు సంబంధించి కటింగ్, గ్రౌటింగ్‌కు సంబంధించి డ్రిల్లింగ్‌ పనులకు ఎక్కువ సమయం పడుతోందని అధికారులు చెబుతున్నారు. పనులను వేగిరం చేయడంపై ఇంజినీరింగ్‌ అధికారులు మరింత దృష్టి సారించారు. సెంట్రల్‌ సాయిల్‌ అండ్‌ మెటీరియల్స్‌ రీసెర్చ్‌ స్టేషన్‌ నిపుణుల బృందం మేడిగడ్డ బ్యారేజీని పరిశీలించాల్సి ఉండగా, పర్యటనపై స్పష్టత రాలేదు.