రూ.16.50 లక్షల విలువైన నకిలీ పత్తి విత్తనాలు స్వాధీనం

గోదావరిఖని, న్యూస్‌టుడే: నకిలీ పత్తి విత్తనాలు రవాణా చేస్తున్న ఇద్దరు వ్యక్తులతో పాటు ఓ వాహనాన్ని పెద్దపల్లి జిల్లా రామగుండం టాస్క్‌ఫోర్స్‌ పోలీసులు మంచిర్యాల జిల్లా చెన్నూరు వద్ద మంగళవారం పట్టుకున్నారు. రామగుండం పోలీసు కమిషనరేట్‌లో ఏర్పాటు చేసిన విలేకరుల సమావేశంలో సీపీ ఎం.శ్రీనివాస్‌ వివరాలు వెల్లడించారు. మంచిర్యాల జిల్లా లక్షెట్టిపేట మండలం కొత్తూరు గ్రామానికి చెందిన సొల్లు పెద్దయ్య(36), సొల్లు హరికుమార్‌(26)లు గుంటూరుకు చెందిన సుబ్బారావు కర్ణాటకలోని కుస్తీ ప్రాంతంలో నకిలీ పత్తి విత్తనాలను విక్రయిస్తుండగా తక్కువ ధరకు 5.5 క్వింటాళ్ల బీటీ-3 నకిలీ పత్తి విత్తనాలను కొనుగోలు చేశారు. రూ.16.50 లక్షల విలువ చేసే నకిలీ పత్తి విత్తనాలను రైతులకు విక్రయించేందుకు సిద్ధమయ్యారు. సమాచారం తెలుసుకున్న టాస్క్‌ఫోర్సు పోలీసులు దాడిచేసి వ్యాన్‌తో సహా నకిలీ పత్తి విత్తనాలను స్వాధీనం చేసుకున్నారు. వ్యాన్‌ యజమాని పెద్దయ్య, డ్రైవర్‌ హరికుమార్‌లను అదుపులోకి తీసుకున్నారు. వారి వద్ద ఉన్న రూ.1.8 లక్షల నగదు, మూడు సెల్‌ఫోన్లు, వ్యాన్‌ను స్వాధీనం చేసుకున్నట్లు సీపీ తెలిపారు. మంచిర్యాల డీసీపీ అశోక్‌కుమార్, అదనపు అడ్మిన్‌ డీసీపీ రాజు, జైపూర్‌ ఏసీపీ వెంకటేశ్వర్లు, సీఐ రవీందర్, టాస్క్‌ఫోర్స్‌ సీఐలు సంజయ్, చిన్ను, వ్యవసాయ ఏవో గ్లాడ్సన్‌ ఉన్నారు.