పచ్చిరొట్ట విత్తనాలకు రైతుల బారులు

మెట్‌పల్లిలో పంపిణీ కేంద్రం వద్ద పచ్చిరొట్ట విత్తనాల కోసం వరుసలో నిలుచున్న రైతులు 

మెట్‌పల్లి, పుల్కల్, ఇబ్రహీంపట్నం-న్యూస్‌టుడే: రాష్ట్రంలో పచ్చిరొట్ట విత్తనాల(జనుము, జీలుగ) పంపిణీ జరుగుతుండగా వాటి కోసం రైతులు బారులు తీరుతున్నారు. జగిత్యాల జిల్లా మెట్‌పల్లి మండలంలోని రైతులకు సుమారు 3 వేల జనుము, జీలుగ విత్తనాల సంచులు అవసరం కాగా వెయ్యి సంచులు వచ్చాయని, బుధవారం మళ్లీ విత్తనాలు వస్తాయని ఇక్కడి అధికారులు తెలిపారు. సంగారెడ్డి జిల్లా పుల్కల్‌లో మంగళవారం జనుము, జీలుగ విత్తనాలు పంపిణీ చేశామని పేర్కొన్నారు. ఉదయం 7 గంటలకే రైతులు పంపిణీ కేంద్రాలకు చేరుకున్నారు. ఎండ తీవ్రత కారణంగా రైతు సేవాకేంద్రం-1 వద్ద పలువురు పాసుపుస్తకాల జిరాక్సుల కాగితాలను వరుసలో పెట్టారు. ఇదేవిధంగా జగిత్యాల జిల్లా ఇబ్రహీంపట్నం రైతు వేదిక వద్ద రైతులు పాసుపుస్తకం, ఆధార్‌ జిరాక్స్‌ పత్రాలను వరుసలో ఉంచారు. జీలుగ, జనుము విత్తనాలు దశల వారీగా వస్తాయని మండల వ్యవసాయాధికారులు పేర్కొన్నారు.