కొత్తగూడెం థర్మల్‌ స్టేషన్‌ కాలుష్యంపై నివేదికివ్వండి

కాలుష్య నియంత్రణ మండలికి హైకోర్టు ఆదేశం

ఈనాడు, హైదరాబాద్‌: భద్రాద్రి కొత్తగూడెం జిల్లాలోని థర్మల్‌ పవర్‌ స్టేషన్‌ వెదజల్లుతున్న కాలుష్యం తాజా పరిస్థితిపై మూడు వారాల్లో నివేదిక సమర్పించాలంటూ రాష్ట్ర కాలుష్య నియంత్రణ మండలి (పీసీబీ)కి హైకోర్టు ఆదేశాలు జారీ చేసింది. ఈ థర్మల్‌ పవర్‌ స్టేషన్‌ నుంచి బూడిద, ఇతర కాలుష్య కారకాలు కర్కవాగు, కిన్నెరసాని నదుల్లో కలుస్తున్నా పీసీబీ అధికారులు చర్యలు తీసుకోకపోవడాన్ని సవాలు చేస్తూ కొత్తగూడెం జిల్లా పాల్వంచకు చెందిన దాసరి రమేశ్‌కుమార్, మరొకరు 2017లో ప్రజాప్రయోజన వ్యాజ్యం దాఖలు చేశారు. ఈ పిటిషన్‌పై ప్రధాన న్యాయమూర్తి జస్టిస్‌ ఆలోక్‌ అరాధే, జస్టిస్‌ జె.అనిల్‌కుమార్‌లతో కూడిన ధర్మాసనం ఇటీవల మరోసారి విచారణ చేపట్టింది. 2022లో పీసీబీ అధికారులు సమర్పించిన నివేదికలో థర్మల్‌ స్టేషన్‌కు చెందిన అవక్షేపాల నిల్వకు ప్రత్యేకంగా ట్యాంకు ఏర్పాటు చేయలేదని, వర్షాకాలంలో వృథా నీటిని కూడా వదిలివేస్తున్నారని పేర్కొన్నారు. ఈ నివేదికకు సంబంధించి తీసుకున్న చర్యలపై ఎలాంటి అఫిడవిట్‌ దాఖలు చేయకపోవడంతో పీసీబీ అధికారులు మరోసారి థర్మల్‌ స్టేషన్‌ను సందర్శించి మూడు వారాల్లో నివేదిక సమర్పించాలని ధర్మాసనం ఆదేశించింది.