పార్వతీ బ్యారేజీని సందర్శించిన జస్టిస్‌ పీసీ ఘోష్‌

బ్యారేజీ వద్ద అధికారులతో మాట్లాడుతున్న జస్టిస్‌ పినాకి చంద్ర ఘోష్‌ 

ఈనాడు, పెద్దపల్లి -న్యూస్‌టుడే, మంథని గ్రామీణం: కాళేశ్వరం ప్రాజెక్టుపై జ్యుడిషియల్‌ విచారణ జరుపుతున్న సుప్రీంకోర్టు విశ్రాంత న్యాయమూర్తి జస్టిస్‌ పినాకి చంద్ర ఘోష్‌ శనివారం పెద్దపల్లి జిల్లా మంథని మండలంలోని పార్వతీ(సుందిళ్ల) బ్యారేజీని సందర్శించారు. శుక్రవారం రాత్రి రామగుండంలోని ఎన్టీపీసీ అతిథిగృహానికి చేరుకుని బస చేసిన ఆయన.. శనివారం ఉదయం సుందిళ్ల గ్రామంలోని శ్రీలక్ష్మీనరసింహస్వామి ఆలయంలో కుటుంబసభ్యులతో కలిసి ప్రత్యేక పూజలు చేశారు. అనంతరం సిరిపురం గ్రామంలోని సుందిళ్ల బ్యారేజీకి చేరుకుని.. తెరిచిన గేట్లను ప్రాజెక్టుపై నుంచి పరిశీలించారు. అనంతరం వాహనంపై 1.45 కిలోమీటర్ల మేర విస్తరించిన ప్రాజెక్టు చివరి(74వ) గేటు నుంచి ఒకటో గేటు వరకు చూశారు. పునరుద్ధరణ పనులను పరిశీలించారు. ఎన్‌డీఎస్‌ఏ నిర్దేశించిన మార్గదర్శకాలకు అనుగుణంగా పనులు నిర్వహిస్తున్నారా? లేదా? అని సమీక్షించారు. ప్రాజెక్టుకు సంబంధించిన సమస్త సమాచారాన్ని నివేదికల రూపంలో సమర్పించాలని అధికారులను ఆదేశించారు. మరమ్మతులు, నిర్వహణ విభాగం ఈఎన్‌సీ నాగేందర్‌రావు, సీఈలు సుధాకర్‌రెడ్డి, విజయభాస్కర్‌రెడ్డి, ఎస్‌ఈ కరుణాకర్, ఈఈ ఓంకార్‌ సింగ్‌ పాల్గొన్నారు.