ఎస్‌జీటీలకూ న్యాయం చేయండి

సీఎం రేవంత్‌రెడ్డికి టీఆర్‌టీఎఫ్‌ వినతి

సీఎంకు వినతిపత్రం అందజేస్తున్న అంజిరెడ్డి, అశోక్‌కుమార్‌ తదితరులు

ఈనాడు, హైదరాబాద్‌: భాషా పండితులు, పీఈటీలకు స్కూల్‌ అసిస్టెంట్లుగా పదోన్నతులు కల్పిస్తున్నందున సెకండరీ గ్రేడ్‌ టీచర్లు (ఎస్‌జీటీలు) నష్టపోకుండా ప్రాథమిక పాఠశాల హెచ్‌ఎంలుగా పదోన్నతులు కల్పించాలని, అందుకు ఆ పోస్టులను 10 వేలకు పెంచాలని టీఆర్‌టీఎఫ్‌ రాష్ట్ర గౌరవ అధ్యక్షుడు మారెడ్డి అంజిరెడ్డి, ప్రధాన కార్యదర్శి కావలి అశోక్‌కుమార్‌ తదితరులు ముఖ్యమంత్రి రేవంత్‌రెడ్డిని కోరారు. ఈ మేరకు సోమవారం సీఎంకు వినతిపత్రం సమర్పించారు. గతంలో హామీ ఇచ్చిన మేరకు పాఠశాలల్లో స్వచ్ఛ కార్మికులు, విద్యావాలంటీర్లను త్వరగా నియమించాలని కోరారు. అనంతరం టీఆర్‌టీఎఫ్‌ నేతలు విద్యాశాఖ ముఖ్య కార్యదర్శి బుర్రా వెంకటేశం, పాఠశాల విద్యాశాఖ కమిషనర్‌ శ్రీదేవసేనను కలిసి వినతిపత్రాలు సమర్పించారు.