Canada: కెనడాలో కాల్పులు.. భారత విద్యార్థి మృతి

(ఫొటో సోర్స్‌: వాంకోవర్‌ పోలీస్‌)

ఇంటర్నెట్‌ డెస్క్‌: కెనడాలో చిరాగ్‌ అంటిల్‌ (24) అనే భారతీయ విద్యార్థి హత్యకు గురయ్యాడు. అతడు కారులో ఉండగా దుండగులు కాల్పులు జరిపినట్లు సమాచారం. విద్యార్థి మృతి విషయాన్ని సౌత్‌ వాంకోవర్‌ పోలీసులు వెల్లడించారు.

‘‘కాల్పుల శబ్దం వినిపించినట్లు ఏప్రిల్‌ 12వ తేదీ రాత్రి 11గంటల సమయంలో ఈస్ట్‌ 55 అవెన్యూ నుంచి స్థానిక పోలీసులకు సమాచారం వచ్చింది. అక్కడికి వెళ్లి చూడగా.. కారులో చిరాగ్‌ విగత జీవిగా పడి ఉన్నాడు. ఈ ఘటనపై దర్యాప్తు కొనసాగుతోంది. ఇప్పటివరకు ఎవర్నీ అరెస్టు చేయలేదు’ అని వాంకోవర్‌ పోలీసులు ప్రకటించారు. ఈ ఘటనకు సంబంధించి ఏదైనా సమాచారం ఉంటే తెలియజేయాలని విజ్ఞప్తి చేశారు.

చిరాగ్‌ హరియాణాకు చెందిన వ్యక్తి. మృతదేహాన్ని భారత్‌కు తీసుకువచ్చేందుకు క్రౌడ్‌ఫండింగ్‌ చేస్తున్నట్లు అతడి సోదరుడు రోహిత్‌ అంటిల్‌ స్థానిక మీడియాకు వెల్లడించారు. మరోవైపు ఈ ఘటనపై కాంగ్రెస్‌ యువజన విభాగం అధ్యక్షుడు వరుణ్‌ ఛౌదరీ ఆందోళన వ్యక్తం చేశారు. దర్యాప్తును క్షుణ్నంగా పర్యవేక్షించాలని విదేశీ వ్యవహారాల శాఖకు విజ్ఞప్తి చేశారు.