రియల్ ఎస్టేట్‌ ఏజెంట్ తప్పిదం.. రూ.24 కోట్ల ఇల్లు బుగ్గిపాలు

సిడ్నీ: కొన్నిసార్లు నిర్లక్ష్యం వల్ల జరిగే తప్పులు పెద్ద ప్రమాదాలకు కారణమవుతాయి. అందుకు ఉదాహరణే ఆస్ట్రేలియా (Australia)లోని సిడ్నీ (Sydney)లో చోటుచేసుకున్న ఘటన. ఇంటి స్టోర్‌ రూమ్‌లో లైట్‌ వేసి ఉంచడంతో అగ్నిప్రమాదం జరిగి మూడు మిలియన్‌ డాలర్ల (సుమారు రూ.24 కోట్లు) విలువైన ఇల్లు బూడిదగా మారింది. ఇంతకీ ఏం జరిగిందంటే.. 

జూలీ బండోక్ అనే మహిళ సిడ్నీలో రియల్‌ ఎస్టేట్‌ ఏజెంట్‌గా పని చేస్తోంది. స్థానికంగా ఉన్న అవలోన్‌ బీచ్ సమీపంలో ఖాళీగా ఉన్న ఇంట్లో ఓ వాటాను పరిశీలించేందుకు మంగళవారం వెళ్లింది. ఆ సమయంలో ఆమెకు బాల్కనీలో పరుపు కనిపించింది. అంతకుముందు ఆ వాటాలో అద్దెకున్నవాళ్లు దాన్ని మర్చిపోయి ఉంటారని భావించి బెడ్‌ రూమ్‌ కింద ఉన్న స్టోర్‌ రూమ్‌లో దాన్ని దాచింది. తర్వాత అందులో ఉన్న లైట్‌ ఆన్‌ చేసి పైకి వచ్చేసింది. 20 నిమిషాల తర్వాత ఇల్లంతా మంటలు వ్యాపించాయి. సమాచారం అందుకున్న అగ్నిమాపక సిబ్బంది ఘటనా స్థలానికి చేరుకుని మంటలను అదుపు చేశారు.

ఈ ఘటనపై యజమాని ఫిర్యాదు మేరకు కేసు నమోదు చేసి పోలీసులు విచారణ చేపట్టారు. దర్యాప్తులో స్టోర్‌ రూమ్‌ నుంచి మంటలు వ్యాపించినట్లు గుర్తించారు. చాలాసేపు లైటు వేసి ఉంచడంతో వేడెక్కి పరుపు కాలిపోయి ఇల్లంతా మంటలు వ్యాపించాయని తెలిపారు. దాన్ని తానే స్టోర్‌ రూమ్‌లో ఉంచినట్లు జూలీ అంగీకరించడంతో ఆమెను అరెస్టు చేసి కోర్టులో హాజరుపరిచారు. ఈ ప్రమాదానికి జూలీ బాధ్యురాలని, బాధితులకు ఆమె నష్టపరిహారం చెల్లించాలని న్యాయమూర్తి తీర్పు వెలువరించారు.