Joe Biden: తోటివారంతా ఆడి పాడుతుంటే.. తదేకంగా నిలబడిపోయిన బైడెన్‌!

ఇంటర్నెట్‌ డెస్క్‌: అమెరికా అధ్యక్షుడు జో బైడెన్‌ పలు సందర్భాల్లో వ్యవహరిస్తున్న తీరు చర్చనీయాంశమవుతోంది. మాటల్లో తడబాటు, అసంకల్పిత చర్యలతో తోటివారిని ఆశ్చర్యానికి గురిచేస్తున్న సందర్భాలు ఇటీవల పెరుగుతున్నాయి. తాజాగా వైట్‌హౌస్‌లో ఏర్పాటు చేసిన ఓ కార్యక్రమంలో పాల్గొన్న వారంతా ఆడుతూ పాడుతుండగా.. బైడెన్‌ మాత్రం కొన్ని సెకన్ల పాటు తదేకంగా నిలబడటం మరోసారి చర్చకు దారితీసింది.

అమెరికాలో బానిసత్వం ముగింపు జ్ఞాపకార్థంగా జూన్‌ 19న జూన్‌టీన్త్‌ హాలీడేని చేసుకుంటారు. ఇందులో భాగంగా వైట్‌హౌస్‌లో ముందస్తు వేడుకలు నిర్వహించారు. ఇందులో ఉపాధ్యక్షురాలు కమలా హ్యారిస్‌తోపాటు తోటివారంతా మ్యూజిక్‌కు అనుగుణంగా నృత్యాలు చేశారు. ఆ సమయంలో అధ్యక్షుడు జో బైడెన్‌ మాత్రం తదేకంగా దాదాపు 20సెకన్ల పాటు నిలబడిపోయారు. ఇందుకు సంబంధించిన వీడియో సోషల్‌ మీడియాలో వైరల్‌గా మారింది.