Pakistan-Afghanistan: అఫ్గాన్‌లో డ్రోన్‌ దాడుల వెనక విదేశీ శక్తి.. అంగీకరించిన పాక్‌..!

ఇంటర్నెట్‌డెస్క్‌: సరిహద్దు వెంబడి ఉగ్రవాద చర్యలకు అడ్డుకట్ట వేసే లక్ష్యంతో పాకిస్థాన్‌-అఫ్గానిస్థాన్‌ (Pakistan-Afghanistan) మధ్య కొనసాగుతోన్న చర్చల్లో ప్రతిష్టంభన కొనసాగుతోంది. ఈ తరుణంలో ఒక సంచలన విషయం వెలుగులోకి వచ్చింది. అఫ్గాన్‌పై డ్రోన్‌ దాడుల వెనక విదేశీ శక్తి ఉందని పాక్‌ అంగీకరించినట్లు తెలుస్తోంది. దానితో ఉన్న ఒప్పందం కారణంగా ఆ దాడులు ఆపలేమని నిస్సహాయత వ్యక్తంచేసిందని సమాచారం. ఈ మేరకు అఫ్గాన్ మీడియాను ఉటంకిస్తూ జాతీయ మీడియా కథనాన్ని ప్రచురించింది.

పాక్ నుంచి అఫ్గాన్‌ డ్రోన్ దాడులు నిర్వహించేందుకు అనుమతించేలా ఆ దేశం (Third country)తో ఒప్పందం ఉందని, దానికి తాము కట్టుబడి ఉన్నామని పాక్‌ (Pakistan) చెప్పినట్లు ఆ కథనం పేర్కొంది. ఆ అగ్రిమెంట్‌ను ఉల్లంఘించడం సాధ్యంకాదు కాబట్టి ఆ దాడుల్ని నిరోధించలేమని అంగీకరించిందని వెల్లడించింది. అయితే ఆ విదేశం పేరు మాత్రం పాక్ బయటపెట్టలేదని తెలిపింది. ఇదిలా ఉంటే.. ఇటీవల పాక్‌-అఫ్గానిస్థాన్ సరిహద్దుల్లో తీవ్ర ఘర్షణలు చోటుచేసుకున్న సంగతి తెలిసిందే. రెండువారాల క్రితం అఫ్గాన్ రాజధాని కాబుల్‌లో సంభవించిన పేలుళ్లతో అవి తీవ్ర రూపం దాల్చాయి. పాకిస్థానీ తాలిబన్ ఫైటర్ల(TTP)కు ఆశ్రయం కల్పించేవారిపై తీవ్ర చర్యలు ఉంటాయని పాక్ హెచ్చరించిన నేపథ్యంలో ఈ పేలుళ్లు జరిగాయి. ఇటీవల కాల్పుల విరమణ ఒప్పందం కుదిరినా అది నామమాత్రమే. పాక్‌-అఫ్గాన్‌ మధ్య దీర్ఘకాలిక శాంతి ఒప్పందం కోసం వీరి మధ్య తుర్కియేలోని ఇస్తాంబుల్‌లో రెండోదశ చర్చలు ప్రారంభమైన సంగతి తెలిసిందే. అవి ఇంతవరకు ఒక కొలిక్కి రాలేదు. ఈ తరుణంలో పాక్ రహస్య ఒప్పందం గురించి బయటకు వచ్చింది.