China: 2035 నాటికి చైనా వద్ద 1,500 అణ్వస్త్రాలు..!

ఇంటర్నెట్‌డెస్క్‌: చైనా అణ్వస్త్రాల సంఖ్యను గణనీయంగా పెంచుకుంటోందని అమెరికా రక్షణశాఖ వెల్లడించింది. ఈ మేరకు పెంటగాన్‌ వార్షిక నివేదికను విడుదల చేసింది. ఇప్పటికే చైనా 400 అణువార్‌ హెడ్లను తయారు చేసిందని దానిలో పేర్కొంది. 2035 నాటికి అణ్వస్త్రాల సంఖ్య మూడు రెట్లకుపైగా పెరిగి 1,500కు చేరుతుందని విశ్లేషించింది. ప్రపంచంపై అమెరికా ఆధిపత్యాన్ని సవాలు చేసేలా చైనా సిద్ధమవుతుందని అభిప్రాయపడింది. 2035 నాటికి తన సైన్యం, సాయుధ దళాల ఆధునికీకరణను చైనా పూర్తిచేయాలని ప్రణాళికలు సిద్ధం చేస్తోందని ఆ నివేదిక తెలిపింది. పెంటగాన్‌ నివేదిక ప్రకారం చైనాకు దాదాపు 10లక్షల మంది సైనికులు, ప్రపంచంలోనే అతిపెద్ద నావికాదళం, మూడో అతిపెద్ద  వాయు సేన ఉన్నాయని ఆ నివేదిక చెప్పింది.

భారత్‌తో సంబంధాల విషయంలో జోక్యం చేసుకోవద్దని చైనా హెచ్చరించినట్లు పెంటగాన్‌ నివేదికలో వెల్లడించింది. భారత్‌-అమెరికా సన్నిహిత సంబంధాల కారణంగా వాస్తవాధీన రేఖ వద్ద ఉద్రిక్తతలు పెరగడానికి కారణం కావడాన్ని నివారించాలని చైనా కోరింది. 2021 సంవత్సరం మొత్తం చైనా వాస్తవాధీన రేఖ వెంట మోహరింపులు, నిర్మాణాలను  కొనసాగించిందని పెంటగాన్‌ పేర్కొంది. చర్చల్లో పురోగతి నిదానంగా ఉందని అభిప్రాయపడింది. ఇరు పక్షాలు తమ ఆధిపత్యాన్ని వదలుకోవడానికి ఇష్టపడటంలేదని తెలిపింది. ఇరు దేశాలు సైనిక ఉపసంహరణలు జరగాలని చెబుతున్నా.. ఆచరణలో మాత్రం అవి సిద్ధంగా లేవంది.