Japan-China: జపాన్‌ ప్రాదేశిక జలాల్లోకి చైనా గస్తీ నౌకలు

బీజింగ్‌: చైనా, జపాన్‌ మధ్య మరోసారి ఉద్రిక్తతలు తలెత్తాయి. ఇరుదేశాల సరిహద్దులో ఉన్న డియాయు ద్వీపం ప్రాదేశిక జలాల్లో గస్తీ నిర్వహించినట్లు చైనా కోస్టుగార్డు వెల్లడించింది. తూర్పు చైనా సముద్ర ద్వీపాలపై ఇరుదేశాల మధ్య చాలా కాలంగా వివాదం నడుస్తోంది. వీటిని తమవంటే తమవని ఇరుదేశాలు చెబుతుంటాయి. వీటిని సెంకాకు దీవులు అని కూడా పిలుస్తారు. తాజా పరిణామంపై జపాన్‌ కోస్టు గార్డు కూడా ప్రకటన విడుదల చేసింది. తమదేశ ప్రాదేశిక జలాల నుంచి వెళ్లిపోవాల్సిందిగా చైనాను పలుమార్లు కోరినట్లు తెలిపింది. దాదాపు రెండు గంటల తర్వాత చైనాకు చెందిన 4 గస్తీ నౌకలు దక్షిణ దిశగా వెళ్లిపోయినట్లు పేర్కొంది. డిసెంబర్‌ 18 తర్వాత తమ ప్రాదేశిక జలాల్లోకి చైనా నౌకలు ప్రవేశించడం ఇదే తొలిసారని జపాన్‌ పేర్కొంది.