Canada: కెనడాలో రోడ్డు ప్రమాదం.. ముగ్గురు భారతీయులు మృతి

ఒట్టావా: కెనడాలో జరిగిన ఘోర రోడ్డు ప్రమాదంలో ముగ్గురు భారతీయులు దుర్మరణం చెందారు. గురువారం జరిగిన ఈ ఘటన ఆలస్యంగా వెలుగులోకి వచ్చింది. స్థానిక మీడియా కథనాల ప్రకారం.. చండీగఢ్‌కు చెందిన రీతిక్‌ ఛబ్రా(23) తన సోదరుడు రోహన్‌ (22) ఉన్నత విద్య కోసం కెనడా వెళ్లారు. వీరికి సెనెకా కాలేజీలో పుణెకు చెందిన గౌరవ్ (24)తో పరిచయం ఏర్పడింది. ఈ ముగ్గురు ఇటీవల గ్రాడ్యుయేషన్‌ పూర్తి చేశారు.

రీతిక్‌ పుట్టిన రోజు వేడుక జరిపేందుకు వెళ్లిన వీరు రాత్రి ఆలస్యంగా తమ కారులో తిరిగి వస్తున్నారు. వేగంగా డ్రైవింగ్‌ చేయడంతో కారు అదుపుతప్పి రోడ్డు పక్కనే ఉన్న ఓ స్తంభాన్ని ఢీకొట్టింది. ఈ ప్రమాదంలో ముగ్గురూ ప్రాణాలు కోల్పోయారు. ఈ సమాచారం అందుకున్న పోలీసులు ఘటనా స్థలానికి చేరుకున్నారు. అయితే, వేరే కారుతో పోటీ పడటం వల్లే ఈ ప్రమాదం చోటుచేసుకున్నట్లు అనుమానిస్తున్నారు. దీనిపై కేసు నమోదు చేసి దర్యాప్తు చేపట్టారు.