Russia: రష్యా ఎయిర్‌పోర్ట్‌పై డ్రోన్ల దాడి.. దెబ్బతిన్న నాలుగు విమానాలు

మాస్కో: రష్యా వాయువ్య ప్రాంతంలోని పొస్కోవ్‌ నగరంలో ఎయిర్‌పోర్టుపై బుధవారం తెల్లవారుజామున డ్రోన్ల దాడి కలకలం రేపింది. ఈ ఘటనలో నాలుగు రవాణా విమానాలు దెబ్బతిన్నాయి. దీంతో రష్యా ఆర్మీ డ్రోన్లపై ఎదురుదాడికి దిగింది. స్థానిక గవర్నర్‌ మిఖాయిల్‌ వెడెర్నికోవ్‌ ఈ విషయాన్ని ధ్రువీకరించారు. దాడిలో భాగంగా నాలుగు ఇల్యూషిన్‌-76 విమానాలు దెబ్బతిన్నాయని, డ్రోన్ల దాడి సమయంలో పెద్ద ఎత్తున మంటలు చెలరేగినట్లు రష్యా మీడియా వర్గాలు పేర్కొన్నాయి. పోస్కోవ్‌ నగరం ఉక్రెయిన్‌ సరిహద్దుల నుంచి 600 కి.మీల దూరంలో ఉంది. అయితే ఈ ఘటనలో ఎలాంటి ప్రాణనష్టం చోటుచేసుకోలేదని స్థానిక అధికార వర్గాలు తెలిపాయి. ఈ దాడి ఘటనపై ఉక్రెయిన్‌ స్పందించలేదు. ఈ ఘటనకు సంబంధించిన వీడియోను స్థానిక గవర్నర్‌ టెలిగ్రామ్‌లో షేర్‌ చేశారు.