కాలిఫోర్నియాలో మళ్లీ తుపాకీ కాల్పులు

ముగ్గురి మృతి, నలుగురికి గాయాలు

బేవలీ క్రెస్ట్‌: కాలిఫోర్నియా రాష్ట్రంలో తుపాకీ తూటాలు మరో సారి పేలాయి. ఇక్కడి లాస్‌ఏంజెలెస్‌ సమీప బేవలీ క్రెస్ట్‌లో జరిగిన తుపాకీ దాడిలో ముగ్గురు మరణించగా నలుగురు గాయాలపాలయ్యారు. శనివారం తెల్లవారుజామున 2:30 గంటలకు ఒక అద్దె ఇంట్లో (షార్ట్‌ టెర్మ్‌ రెంటల్‌ హోమ్‌) ఈ కాల్పులు జరిగినట్లు పోలీసులు తెలిపారు. చనిపోయిన ముగ్గురూ వాహనంలో ఉండగా.. గాయపడిన నలుగురూ బయట ఉన్నారని వివరించారు. ఆ అద్దె ఇంట్లో ఏమైనా పార్టీ జరిగిందా, అది ఎలాంటి పార్టీ అనే కోణంలో పోలీసులు దర్యాప్తు చేస్తున్నారు. ఆ ఏడుగురి వివరాలనూ వారు బయటపెట్టలేదు. కాలిఫోర్నియా రాష్ట్రంలో.. నెల రోజుల వ్యవధిలో ఇది నాలుగో తుపాకీ కాల్పుల ఘటన కావడం గమనార్హం.