ఆస్ట్రేలియాలో రేడియోధార్మిక క్యాప్సూల్‌ గల్లంతు

1400 కి.మీల మేర గాలింపు

కాన్‌బెర్రా: ఆస్ట్రేలియాలో కనిపించకుండా పోయిన ఓ చిన్న క్యాప్సూల్‌.. అక్కడి అధికారులను హడలెత్తిస్తోంది! అందులో రేడియోధార్మిక పదార్థం ‘సీజియం- 137 ఉండటమే ఇందుకు కారణం. ఆ గుళికను తాకడం లేదా దగ్గర ఉంచుకోవడం తీవ్ర అనారోగ్యానికి దారితీస్తుందని అధికారులు హెచ్చరిస్తున్నారు. ఈ నేపథ్యంలో అటువంటి వస్తువు ఏదైనా కనిపిస్తే దూరంగా ఉండాలని ప్రజలకు సూచిస్తున్నారు.

6 మి.మీల వ్యాసం, 8 మి.మీల పొడవు గల ఈ క్యాప్సూల్‌ను ఇటీవల ఓ ట్రక్కులో పశ్చిమ ఆస్ట్రేలియా న్యూమన్‌ ఉత్తర ప్రాంతం నుంచి పెర్త్‌కు రవాణా చేస్తుండగా.. మార్గమధ్యలో ఎక్కడో పడిపోయింది. దీంతో అప్రమత్తమైన అధికారులు గాలింపు చర్యలు ముమ్మరం చేశారు. మొత్తం 1400 కి.మీల మేర వెతుకులాట కొనసాగిస్తున్నారు.

సీజియం- 137ను మైనింగ్‌ కార్యకలాపాల్లో వినియోగిస్తారు. అది రేడియేషన్‌ను విడుదల చేస్తుందని, దాన్ని తాకిన, లేదా వెంట ఉంచుకున్న వారికి కాలిన గాయాలు, క్యాన్సర్‌ వంటి దీర్ఘకాలిక సమస్యలు ఎదురయ్యే అవకాశం ఉందని అత్యవసర సేవల విభాగం హెచ్చరించింది. ఆ క్యాప్సూల్‌ ఫొటోను విడుదల చేసింది. ఎవరికైనా కనిపిస్తే వెంటనే తమకు సమాచారం ఇవ్వాలని సూచించింది.